Blog

Cha y est, au soér ché gosses i' vont ête in vacances. I' sont raflakis, i' vont pouvoér s'érposer, prinde leu temps. Pis si i' prénne l'air, i' vont miux dormir. Bin sur, i' va pos falloér qu'i' passent leu nuit su l' tablett' ou bin dins chés rues. I' feut pos non pus qu'i' laissent leu carnasse accreuchi ach' cleu, pasqu'in oublie vit' cho qu'in apprin' si in fait pos travaillii sin ciboulot. Y a quit' énnées, y a kit'z'in qu'a dit qu'i' fallot pos donner des dvoèrs à s'mason. Là, chés parints, i' z'ont art'nu. Comme chi lire in live ou réchiter chés l'çons pouvot faire du ma. Ch'est l'monne à l'invers. Ch'est la débindabe comme in dit. I' vont putôt dévnir des baudets ; i' pourront s'taper la honte. Après cha, i' peuvent juer ou vir leu camèrades. Ou bin aller à l' bibiothéque. Justemint, y a in bon live pou chés jonnes qu'Aurélie Valognes alle a écrit, "Clovis et Oups", avuc békeup d'images mais pos granmint d'écriture. Pis plein d'eutes ouvraches pou chés grinds pis chés tiots. Ch'est simpe, ch'est ouvert tous les mercrédis intér 15h30 et 18h00. Y a pos d'quo s'innuyi. Bonnes vacances et érposez-vous bin !...

Eul' 14 févrii, ch'est l' Saint Valintin, eul' fête eud' chés amoureux. Mais attintion, ya pos qu'euch' jour-là qu'i feut avoèr ker eus'moitii. I' feut l' faire tous les jours, sinon ch'est du cinéma. Après cha, ben sûr qu'i' n'a pos eud' ménaches sins nuaches. Mais euch' jour in question, in put foère un effort et akater ène fleur. Ch'est parel, ch'est ch'gesse qui compte, i' s'agit pos eud' dépinser chou qu'in a pos.

Vous savez, cha r'monte à loin eul' fête-là, et ch'étot pos catholiqu'... j'vas vous expliqui.

In fait', du timps eud' chés Romains, y avot chés "Lupercal'", ène fête païenn'. Chés hommes, i parcourint eul' ville in fouettant chés femmes su' leu panche avu' des lanières pou' qu'alles puss' avoér des gosses. In dit oussi qu'chés hommes, i' z' déshabillint et pis i' mettint eul' piau deul' bête qu'i' z' avint sacrifii, in mouton ou in kien, pasqu'i' croyint que comme cha, i' serint fertil'.

Ch'étot ène fête populaire. Mais feut savoér euq' chés chrétiens, i' z'ont toudis voulu eul' l'interdire. Alors i' z'ont invinter eul' Saint Valintin, in peu in l'honneur deuch' prête Valintin eud' Rome, qui mariot des coup' in s' muchant. Ch'étot dins l'Intiquité.

Pis avu' Chaucer, in Inglais, eul' Saint Valintin, alle a pris ène valeur romintique. Feut lire "Euch' Parlemint eud' chés oésieux". Pasqu'à l' date-là, eul' 14 févrii, chés oésieux, i' c'minchent leu saison des z' amours. Shakespeare, in eute poèt' Inglais, i' a oussi mis sin grin d' sel.

Quint à l' prémiére carte eud' Saint Valintin, alle date eud' 1415. Euch' Duc d'Orléans, qui étot prisonnii dins l'Tour eud' Londes, il l'a invoyi à s' femme.

Bin sûr, pindint la guerre, chés gins, i' s'invoyint des tchots mots, cha fasot békeup d' bien à chés souldats.

Pouleur, feut qu' cha rapporte des sous...

Eul' s'maine-chi, in a perdu in grin' t'homme, euch' Major eud' gindèrmerie Fabrice Gaveriaux. Ch'étot in gars bin comm' i' feut, droét, conscieinchieux, pis travailleux. In a yeu l'occasion de l' cotoyi quint' il étot à Roézel et à Péronn'. In sacré gindèrme ; attintion, dins l' bon sins'. Sin coeur il a lâchi, qué malheur ! In plaint s'femmme pis ses gosses, ch'est pos permis. Malheureuz'mint, in n'y put pos grin' cose...

Inn' n'ont ène bonn' chés gindèrmes, avu tous chés galoupiots qui font d' travers, chés bindits. Et i' sont eud' moins in moins respectés. In est dins in drôl' eud' monde. Feut s'accrochit pis ête vigilant. Et pos oublii eud' fermer ses portes et d' pos laisser traîner sin sac, ses bijoux ou s' n'argint.

In tout cas, ène chose est sûre, ch' l'homme-là, i' rest'ra dins nos mémoére... Merchi à li !

Ouaih, in parle de l' planèt', pis in n' fait rin, à c'mincher pa' trii chés déchets. Ch'est fachile, in met tout' dins l' poubelle, pasqu'in s'in fout. Ou bin, in met ch' brin dins ch' l'auto, pis in va l' bézarder dins l' nature. Ah ouiah, alle est belle eul' Frince. L' dernière mote, ch'est d'aller s' débarrachi à chés bacs à verre : ène cabine eud' douch, ène lampe broyii, des loques, et j'in passe... Feut vir' euch' dallache ! Pis chés gins, i' sont tellemint fainéants, même quint' i' vont porter chés verres, i' posent leu sacs et pis cha resse là. Sins compter qu' cha présinte in dingi, pasque cha casse et quit'zin put cair et s' blessi. Mais in a l' solution. Ch'est deul' feute deuch' Maire ! Eh, feut pos prinde chés gins pou' des niqu'doules ! Et pis, inter nous, si in va avu' s' n' auto jusqu'à ch' bac à verre, in put aller jusqu'à l' déchèterie. Chés poubelles passent tous les quinze. À l' Mairie, in a des sacs gratis ; des blus pou' chés papiis et chés cartons, pis des jaunes pou' chés boutelles et ch' l'alu ; i' suffit eud' trii au fur et à m'sure. Et pis, in est à l' campagne, alors in akate in composteur et pis in mets chés épluchures, chés marcs eud' café, chés coquil' d'ufs, ch' l'herbe, et tout cha, pis quint 'in fait sin gardin, cha fait du terreau qu'in épare eud' dins, cha est bon. Voyez euk' ch'est fachile !..

I' fait froéd pis cha récoeuffe, ch'est comm' cha qu'in quét malat'. I' n'a plein d'gins qui rindent leu boyeux, i z'ont ma à leu panche, i' z' éternuent, i' z' ont de l' fièfe, i' toussent. Bin sûr, i' n' sortent pus, i' sont toudis dins leu cahute, ach' fû. I' feut prinde l'air. In met s' casaque et pis in s'remue. Pis avuc chés microb', i' feut souvint s'laver ches mains, feut pon ête crapé. Et oussi acouter ch' médecin. Mi, i' m'a dit de m'faire vacciner, je l'ai acouté. In pus, l' grippe alle put ête mauvaise. Et l' Covid oussi. Si in s'croit pus malin que ch' médecin, cha sert à rin d'aller l' vir. Infin, chacun fait comm' i' vut...

Ouaih, quint' in est jonne, in s'occupe pos de rin. In fait l' fou, in va à l'école, in voit ses copains, pis vlà toute. Quint' in grindit, in n'acoute pus autant nos pareints, in s'amourache, in fréquente quo', in voit la vie in rose, in a pos d' soucis, in a la vie belle feut dire. Après, cha c'minche à ête sérieux. I' faut peinser à s' av'nir, appreinde un métii. Pis faut cmincher à compter ses sous, à s' faire un magot pou s'mette in ménache ou pour acater des meubes. In rigole pus tant, ou alors in est vit' dins l'imbarras. Là in a des responsabilités et ch'est pus à nos parints d' s'occuper d' nous, ch'est normal. Et pis, si in s'occupe trop d' nos copains, in est vite al' rue, pasqu'in put pos s' caser et pis faire l' java toudis. Et si in a des gosses, i' feut qu'in montre ch' l'exemple. Ch'est là qu'i' feut qu'in yeu rabache chés lçons qu' nos pareints i' nous répétint, qui nous fasint rire ou mette nos zius à l'invers, mais là in avot éne patarafe, pace que ch'respect, ch'étot tout'. Poleur, chés gins i' n' respectent pus rin, même euch' Maire et pis ch'curé. Ch'est pour cha qu' l' monde i' va d' travers, in a laissé chés valeurs fout' l' camp. Pis quind ch'est parti, trop tard pour erdréchi. Qué malheur !...

Ch'l'hiver, i dure. In est ingèlé. In a békeu eud'neige, fallot s'in douter. Pi inn'n'a cor'. Au matin, j'ai fait attintion in déneigeant chés marches eud' la Poste, épaiches eud'glache, faudrot pos qu'chés gins y glichent. J'ai yeu froéd à mes piids, éj'sus po cor' rékeuffé.

Mais feut dire euque cha fait des bieux paysages. T'nez, y a même des gins qui sont des artistes, vlà ène oeuvre d'art, ouaih ouaih...

Merchi eul' fame, d'avoir partagi cha avuc nous !

A Ronssouo, in a ène cantine pou chés gosses eud' l'école.

J'ai été vir ch'menu du jour. I vont mingi deul' soupe, sûrement avu des patates eud' dins, du gaimbon al' sauce tomate, des noulles avu du fromache, du pain de ch'boulingi, pis cor' deul' tart' a pommes. Bin sur, i vont po boire eud' pinar, mais eud'd'ieu.

I vont éte goulaffe a éte nourri comme cha. Po à s'plainde. Après i pourront juer, pi ben acouter ch'maîte et pi apprinne.