Blog

Mes gins, feut que j'vous dise. Vous savez qu'i' y a ène bibiothèque à Ronssouo. Si vous allez su' ch'site internet d'eul' mairie, y a même ène rubrique. Eul' secrétaire eud mairie, alle lit in attindint sin bus, pis putôt qu'eud' mette ses lives dins un coin, alle les donne pou' partagi avuc' cheut' qui aiment bin lire. Pis alle met un tchot parlache au sujet d'euch' live dins l' rubrique su' ch' site. Cha permet in puss' d'avoir des lives pos viux. Donc, alle a aussi akaté des lives in picard. Pis comme à Ronssouo, i' font ch' Circuit eud chés écrivains, i' feut moutrer qu'in s'intéresse ach' picard, eul' lingue. Alors vl'là-ti pos qu'i' y a un rayon picard à l' bibiothèque. Bon y a des lives in picard, mais n'ayez pos peur, y a aussi des lives in frinçais qui parle d'eul' Picardie, des contes, tout cha... Mais à vous eud' vir'... Mais ch'est békeup bien.

Bon un tchot rappel : eul' bibiothèque, alle est ouverte eul' mercredi, eud 15h30 à 18h00. Ch'est deux bénévoles qui tiennent cha : Jacqueline et Corinne. Merci à chés famm'-là !

Bon, ch'est pos l' tout mais ch' timps i' passe, pis j'ai pos cor' pris ène minute pou' vous présinter mes voeux. Ouaih, ch'est important.

Mes gins, euch' vous souhaite eul' sinté, pasque ch'est ène sacrée richesse.

Pis avu' cha, tout ch'resse euq' vous pouvez attinde.

Faudrot oussi qu'i nn'a qui seuch' meilleur avu' euz eutes, mais cha ch'est ène eut' affaire.

Pis des belles rincontes, pis des bieux momints picards tint qu'à faire...

À l'ervoyure !

Ouaih, Françoise Desmaret, a' nous z'a rap'lé euq mercredi 2 octobe, à 9 heures 5 au soér, y avot ène émission al télé, su' France 3, su' chés gins d'euch Nord eud Franche. Feut pos minqui cha. Ch'est un documintaire su ch'parlache d'euch Nord. I' z'ont réalisé cha pindint ch'émission "T'es d'min coin". Cha est békeup intéressant. Nos rachines quo ! In va pouvoir canter "Chés gins d'euch Nord" à no' façon. Ch'pays, chés gins, eul' vie, euch l'industrie, pis ch'reste. In va vir pourquoé in dit toudis qu'i' sont gintils pis tout'. Surtout ravisez !

Bonjour mes gins ! Cha y est, eul' rentrée, alle est passée, pis ch'a été.

Bon, j'vas faire un peu eud' réclames pou ène des notes, Françoise Desmaret. Vous savez, eul' tchote femme bin sympathique qu'alle a animé un "tchop souper" à Ronssouo in juin, pis qu'ches gins, i'z'ont eu du ma' à leu panche, tellement i'z'ont bin rigolé. Pis s'sont instruits in supplément. Tou cha pou l' même prix, ch'étot éne occasion.

Bref, eh bin, pou l'sui're, l'racouter ou l'découvrir, i' feut acouter France Bleu Picardie :

• du lundi au vendredi, à 6h10, dins "L'Éphéméride picarde" ;
• ches samedi et diminche, eud' 10h00 à 11h00, dins ch'l'émission "T'es d'min coin" (cha, ch'est sûr, pasqu'alle restot à Villers-Faucon dins l'temps) ;
• du lundi au vendredi, eud 11h00 à 12h00, "L'Muche", su' des lieux et des personnages muchis in Picardie.

Pis cor', allumez vo' télé su' France 3 Hauts-de-Frince, eul diminche à 11h55, pou' ch'l'émission "C'est bien ici" (pis notez cha : à partir d'euch 6 octobe, cha s'ra aussi su' France Bleu Picardie à 17h30).

Bon, telle qu'un connot "Tchote Françoise", in risque pos d'être déçus. J'vas marqui cha su' mes tablettes. À l'prochaine !

Vous savez, mes gins, in a vécu des momints forts chés 11 et 14 juin. Tout cha in mémoére eud Paul Moiret. Sin picard i' vivra toudis, cha ch'est sûr. Bin sûr, y a eu éne exposition ach' l'église, qui racontot eusse vie. Pis éne chélébration, avuc s' famile, mais auchi ch' l'Abbé Brunel eud' Péronne, Dominique Langlet, d'euch l'église protestante unie eud' France, euch' l'Agince Régionale pou' l'picard, pis Françoise Desmaret, eul' célébrité qu'alle a éne émission su' France bleu, eul' radio. Pis d'eutes personnes importintes. Ouaih, ch'est bieu eud' vir tout cha dins un tchot pays comme eul' not'.

Après cha, dins l'soirée, y a eu un r'pas picard, in a rimpli s'panche pi in a rimpli s'caboche avu' tout c'que Françoise alla a raconté pis nous a appris. Faut bin s'intraîner à parler picard.

Feut simplemint dire qu'ch'étot formidabe.

Eul' vindredi, y a eu chés discours eud' chés officiels, ch'est normal, pis in a cor' ergardé ch'exposichion. Chés gosses eud' l'école, i' z'ont canté in picard ; ah, ch'étot réussi, i' z'ont du talint. Après in est parti faire euch circuit dins chés rues, alle Mairie, ach' Chinmétiére, ach' l'église, pis à s'mazon. Brigitte Glowacki, avu' s'n'habit eud' picarde, pis René Degenne, i'z'ont lu des textes in picard eud' Paul Moiret. Après cha, in a bu in keup. Pis in a pu découvrir euch' live euk' l'Agince a publii. Eud' dins, y a 110 poèmes eud' Paul Moiret. In bieu live. Faut bien ermercii cheux qui ont donné leu temps pour ch'résultat-là : Olivier Engelaere, d'euch l'Agince, Carole Morel, Sylviane Witz, pis Jean-Pierre Darras. Merchi aussi à Pierre Leroy et Jean-paul Prévot pou' l'mise in valeur d'euch l'exposition. In a deul' chance eud' vous avoér. Merchi !!!

Eul' sam'di quate d'euch moi eud' mai deux mille vinte quate, Jean-Marie MOIRET nous a quittiis.

Ouaih, in est rud'mint trisse passqu'in l'connaissot bien. Chés gins d'euch villache bin sûr, surtout chés inciens. Feut dire qu'il a pos eu d'chance, il a attrapé l'polio in étint tiot.

In l'a connu quint' in étot élèves ach' Collège eud' Roisel. I' travaillot ach' secrétariat eud' gestchion.

Il étot poli, discret. Jamais i' n'a eu un mot eud' trop ni dit du ma' eud' quit'zin. In l'appréciot fort.

Avu' ène collègue prof' eud' maths, in allot l' vir din sin tiot bureau, quind' ch' collège il a été r'fait à nu. In étot solidaires, pour nous, i' méritot pos sin sort. Pis in aimot discuter avuc' li.

Et feut dire qu'il avot des dons et in attach'mint pour eul' langue picarde. Ouaih, euch' picard, ch'étot quit'kose pour li. Sin père Paul, il yi a donné eul' goût d'euch' parlache-là. Quint' il a été in ertraite, sin père a écrit des pages et des pages eud' souv'nirs, d'eusse vie, eud' chés camps, eud' chés métiis, d'euch villache eud' Ronssouo, pis ch' qu'il a vécu pindint chés deux grindes guerres. Eul' Commune, alle va i' rinde hommage in  juin. Cha ch'est békeup bin.

In est d'autant pus trisse pass'qu'in aurot eu ker euk' Jean-Marie  i' voit' ch' traval importint qu'in a foit pour mette in valeur sin père. C'est pour concherver ch' patrimoène eud' no' villache, et r'mette in lumière euch' picard.

Pis Jean-Marie oussi, il a békeup écrit, in frinçais pis in picard.  Il avot même été lauréat d'euch grind prix Edouard David, avuc' ses textes in picard. Pis il a été oussi publii dins des r'vues.

Il avot tint eud' qualités euch' Jean-Marie. Pis pourtint, il s'est jamais mis in avint. Qué homme !

Il a fallu qu'eul' sale maladie, alle fasse souffrir et nous l' prenne... Pas jusse. Mais in n'y put rien. Seuf dire à ses soeurs, Hélène et Agnès, pis à tout leu' famile qu'in l'avot ker , pis qu'in est à leu' côtés, pis qu'in l'oubliera pos, eud' tout' no' vie, euch' grind homme qu'il étot et qu'in put s'erdréchit d'euch' que li pi leu' père i' z'ont fait pou' l'richesse d'euch picard.

Merci pour tout'.

Mes gins, y a eu in grint' évènemint hier - in étot vindredi 12 avril. I' avot du mon.ne alle salle des fêtes. Ouaih, in signot eul' Charte pou' garder no' lanque picarde.

Feut dire, chés traditions, cha vaut eud' l'or. Ch'est nos rachines. Pis comme euch' Maire i' tient à sin patrimoine, alors il intraîne avuc li plein d' gins : sin Consel Munichipal, chés maîtresses d'école avu z'infants, pis tous cheut' qui veulent bin. Ch'est pus que formidabe.

Tout ch'villache étot invité.

Y avot cheut' qui travallent ach' l'Agince del Région pour el Langue Picarde, ch'est à dire : Anne Tiberghien, eul' Présidinte, Françoise Desmaret ,eul' Vice-Présidinte pou' la Somme - alle fait ène émission su' France Bleu in picard, ch'est békeup bien - et Olivier Engelaere, euch' Directeur, fort actif dins tous chés projets. Faut pos oublii non pus René Degenne - i' resse à Ronssouo - avu' sin parlache in picard ; in pus, il a canté ch'l'Andoulle : il a eu grind'mint eud' succès, pis in a bin rigolé.

Chés Maires eud' Limpire, Thierry Cornaille, et d'Épy, Jean-Michel Martin, étint présints, cha fait plaisir.

Chés infants i' z'ont canté des canchons in picard, i' sont doués. Merchi à eux pou' leu talent et leu' bonne humeur, et merchi à chés maîtresses, qu'in put vinter chés qualités d'apprinde chés gosses.

Ch' Maire, eul' Présidinte Anne Tiberghien, pis Maryse Fagot - in put mette in avint tout ch' boulot qu'alle fait pou' tout l'monte - i' z'ont signé eul' Charte.

Après cha, chés gosses i' z'ont porté eul' pincarte "Ronssouo", qué fierté !

In a pris des images avuc' tous chés Conseillis présints et l' tchote qu'alle travalle à l'école.

Pis ch'est pas tout cha, mais il a fallu rincer chés gosiers avuc des verres, pis des chukes pou' chés infants.

Ène sacrée réussite ! Bravo à tertous !